Naatsorsueqqissaartarfiup ukioq manna ilinniartitaanermut kisitsisitigut paasissutissat allilerpai, massakkullu Kalaallit Nunaanni ilinniakkat 2003-mit 2015-imut ilinniarfinnut agguataarlugit takuneqarsinnaanerat periarfissaalerpoq. Saqqummersitami uani Kalaallit Nunaanni ilinniarfiit kisimik pineqarput, kisiannili suli Naatsorsueqqissaartarfiup Kisitsisaataasiviani kalaallinut Kalaallit Nunaata avataani ilinniartunut paasissutissat aaneqarsinnaapput.

 

Ataani titartagaq 1.-imi takuneqarsinnaapput Kalaallit Nunaanni ingerlariaqqiffiusumik ilinniarfinni ilinniakkat aallartinneqartut, ilinniakkat qaffasissusaannut sisamanut agguaallugit.

 

Titartagaq 1. 2006-imit 2015-imut Kalaallit Nunaanni ilinniakkat aallartinneqartut

Najoqqutaq: Naatsorsueqqissaartarfik- Kisitsisaataasivimmi kisitsisit takukkit (http://bank.stat.gl/UDDISC11E).

 

2015-imi ilinniakkat aallartinneqartut 343-usimapput, taamalu ukiut pingajussaanneertumik amerleriarsimallutik. Agguaqatigiissinnerini inuussutissarsiutigalugu bacheloritut ilinniakkat ilinniakkani aallartitani 57 proncetiullutik nuannarineqarluarsimallutik.

 

Titartagaq 2.-mi takutinneqarpoq 2015-imi ilinniakkat qaffasissusaanni aallartinneqartut, Kalaallit Nunanni ilinniarfinnut agguaallugit.

 

Titartagaq 2. 2015-imi Kalaallit Nunaanni ilinniakkat aallartinneqartut

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (http://bank.stat.gl/UDDISC11E).

 

Inuussutissarsiornermi ingerlariaqqiffiusumik ilinniakkani sivikinnerni aallartitani 66-iusuni 44-t Niuernermik Ilinniarfimmi Nuummiittumi aammalu 15-it Campus Kujallermi aallartissimapput.

Inuussutissarsiutigalugulu bacheloritut ilinniakkani aallartitani 195-iusuni 121-t Nuummi Ilisimatusarfimmi aammalu 64-it Ilulissani Perorsaanermik Ilinniarfimmi aallartissimapput.

2015-imi Ilisimatusarfimmi ilinniakkat aallartinneqartut katillugit ilinniakkat qaffasissusaannut agguaallugit 203-upput.